網上賣相

Amy從事投資工作，玩相機超過十年，同時亦是旅遊發燒友，兩年前發現普通人都可以網上賣相，決定一試。身邊有不少朋友都有樣學樣，賣相賺外快，寓興趣於賺錢。

每逢假期都見到影友四圍影相，不過影落一大堆相，好多時都得個「擺」字。Amy亦不例外，「每年至少去三、四次旅行，每次都影落幾百張相，除了間中俾朋友睇，其實自己好少翻睇。」兩年半前由DC機仔轉玩DSLR，諗住去外國攝影討論區睇心得，先發現原來有賣相網站幫手賣相，「當時都半信半疑，怕網站呃個人私隱。」之後同其他影友提起賣相網站，點知有人話聽過，仲好想試，於是將手頭上的賣相網站資料交給他試，「一個月後他說已經收到錢，於是自己都做埋一份。」影相多年，諗住有相當攝影技巧，賣相無難度，但原來想申請竟要考試，「首先申請Shutterstock，跟指示影低護照個人資料頁面再電郵過去，點知原來仲要考試，要求我揀十張相俾對方審查，有七張合格先可以成為會員。睇番對方要求，原來有商標、有人的相，都有版權同肖像權問題；如果用側光影的相，或是原相有明顯雜訊，都好難過關。如果無睇，一定『肥佬』，要等三個月（現已改為一個月）先可以再考，好彩做足準備，結果一次pass。」

正式開始賣相生涯，無論素材相、旅行相、夜景相統統賣過，日頭返工夜晚上載，每次上載相片網站都要審查，時間由即日至三日不等。「最頭痛不是點構圖，而是點揀keyword介紹張相，揀錯隨時無人買。」兩年內，Amy成功上載三百幾張相，不過接近一半被退回，「被退回的相都有評語講解原因，可以幫我提升攝影技巧。雖然我比較懶，上載相片數目少，但其實每次有新相上載，即月都有百幾美元收入；就算無新相，每個月都穩定有幾十美元。有部分遲我一年賣相的影友，已經上載千幾張相，每月最少收到四百美元，其實肯做，隨時兼職變全職。」

賣相兩年，Amy發現最好賣的是旅遊相，「不一定好特別的風景相先好賣，反而一睇就知是邊個國家更好，因為好多時網民未必去過當地，又要用當地的相，就會去網站買。」另外，由於每張相上載時都要自定最少七個keyword，Amy話如果諗不到，可以去賣相網站搵近似相片，「照抄對方的keyword，自己再諗多一、兩個，一定湊夠數。」

易賺錢 Shutterstock
賣相數量最多，較易賣大解像度相，不過審查繁複。網址：http://www.shutterstock.com

雙重考核 iStockphoto
iStockphoto最初只是一個普通攝影網，之後發現網上賣相有利可圖而轉型。同Shutterstock一樣，需要經過考試先可以成為會員，不過，iStockphoto要先通過一輪筆試，之後再上傳三張相審批，全部過關先可以開始賣相。網址：http://www.istockphoto.com

登記簡便 Dreamstime
是國內攝影界最多人參與的賣相網站，主要是因為毋須考試，亦不需用護照登記。加上網站支援中文，所以更加受國內攝影師歡迎。網址：http://www.dreamstime.com

分賬高 Fotolia
來自美國紐約，現時註冊會員已超過500萬，成功賣出的相片亦超過50萬張。只須登記成為會員，就可直接上載相片審查，過關後即可上架。網址：http://www.fotolia.com