Friday, June 22, 2012

從 Google AdSense 屈錢

講起積少成多,大家唔知道有無用過Google Adsense既自動轉賬收錢?香港係Google其中一個可以用自動轉賬收錢既地方。如果曾經用過既,都可能記得,當你登記一個新既銀行戶口既時候,Google為左核實戶口資料是否正確,會存入一個好細既銀碼入個戶口度,大概有5蚊左右(港幣)。亦即係話,每次你登記一個新既銀行戶口,你就可以勁賺$5,雖然的確好少,但都只不過係花費1分鐘左右求其撳幾下,咁就撳到錢,都算係咁啦!

Wednesday, June 20, 2012

買保險也賺錢

尋日講到交稅賺錢,令我唸起早幾年,有個朋友個朋友,係Manulife做保險sales,佢遊說我買份人壽保單,要先俾保費2萬幾銀,可以用credit card俾。當時為俾面朋友,真係唸住買既,就用信用卡俾左錢,但係番到屋企又覺得好似無咩需要,好在,香港規定保險必須有21日冷靜期,只要21日內寫信退保,可以全數攞番錢。當時好型,二話不說寫信去退保,無幾耐,收到Manulife退款,你應該估到,無錯,退款係用支票退的!既然唔係入番落credit card,當然亦唔會影響我經已袋左落袋既信用卡1%現金回贈啦!

唸唸下,成日有人打電話黎sell保險,行行下街都會有d保險sales走埋黎叫你買,下次都係唔好咁絕即刻cut人線啦,一於俾卡,買左先算。退保之後,如果d錢係退番入信用卡度,咁都無損失既,但如果係支票退呢,哈,2萬既1%係$200,唔啱買份20萬既,積少成多呀!

Tuesday, June 19, 2012

交稅也賺錢

早幾個月到期要交上年既稅,我一時笨實,在網上銀行用信用卡bill payment,撳完一次之後以為仲未撳,轉個頭又撳多次,結果交多左一倍稅,發現後原本覺得自己on9非常,無可饒恕,但之後竟然發現此一笨實行為帶來無意既收獲。

話說我發現後,即刻上稅局個網了解點樣退番錢,上面話多繳既稅款會自動以支票形式退回立稅人府上,無需申請。我又打電話去稅局求證,確定的確如此幾星期後果真收到稅局既退款支票


咁有乜叉野著數?留意稅局退錢係退支票而唔係退番入張信用卡度,所以係唔會影響銀行已經送左俾你既積分或回贈。用信用卡交稅,銀行好多時會推出各類額外積分或回贈優惠舉例你有現金回贈1%咁如果你原本要交1萬蚊稅你一個唔小心撳多左個零交左10萬蚊交多左既9萬會好快會支票退番俾你而呢9萬蚊信用卡數銀行送俾你既1%即900蚊現金回贈你則已經袋袋平安了你話正不正乎?假如你唔止撳多個零咁簡單,而係將個1字亦撳錯做個4字,加埋後面個零,你既回贈都可能夠買部新電話架。